വൈദ്യ ശാത്ര വിദ്യാർത്ഥിയോട് - ബാലചന്ദ്രൻ ചുള്ളിക്കാട്

Photo by Mathew MacQuarrie on Unsplash

 ഞാൻ മരിക്കുമ്പോൾ ശവം നിനക്കു തരും
എന്‍റെ മസ്തിഷ്‌കം നീ പരിശോധിക്കും
ഉന്മാദത്തിന്‍റെ ഉറവിടം കണ്ടെത്താനാവില്ല

എന്‍റെ കണ്ണുകൾ നീ തുരന്നു നോക്കും
ഞാൻ കണ്ട ലോകരൂപം അവയിലുണ്ടാവില്ല
എന്‍റെ തൊണ്ട നീ മുറിച്ചു നോക്കും
എന്‍റെ ഗാനം വെളിപ്പെടുകയില്ല
എന്‍റെ ഹൃദയം നീ കുത്തിത്തുറക്കും
അപ്പോഴേക്കും ഇടിമിന്നലുകൾ താമസം മാറ്റിയിരിക്കും
എന്‍റെ അരക്കെട്ടു നീ വെട്ടിപ്പൊളിക്കും
അതറിഞ്ഞ മഹോത്സവങ്ങളോ ആവർത്തിക്കപ്പെടുകയില്ല